तरुण दलले प्रधानमन्त्री ओली विरुद्ध अमेरिकामा प्रदर्शन गर्ने

दूरबिन नेपाल     ८ आश्विन २०७५, सोमबार ०४:४३    

तरुण दल अमेरिकाले प्रधानमन्त्री के पी शर्मा ओली नेतृत्वको सरकारका पछिल्ला गतिविधिको विरुद्धमा संयुक्त राष्ट्र संघको कार्यालय अगाडि प्रदशर्न गर्ने तयारी गरेको छ । नेपाली काँग्रेस निकट रहेको नेपाली जनसम्पर्क समिति अमेरिकाका केद्रिय सदस्य प्रमोद सिटौलाका अनुसार तरुण दल अमेरिकाका उपाध्यक्ष अनन्त राज सुवेदीले स्थान समेत बुक गरिसकेका छन् । संयुक्त राष्ट्र सङ्घको कार्यालय अगाडि प्रदर्शन गर्न अनुमति लिनु र स्थान बुक गर्नु पर्दैन । सिटौलाले दूरबिन नेपालसँग कुरा गर्दै भने “त्यस ठाउँमा धेरै प्रदर्शन भइरहने हुँदा अनन्तराज सुवेदीले स्ट्रिट ४७ फस्ट एभेन्यू अगाडि प्रदर्शनका लागि अनुमति र स्थान सुरक्षित गरेका हुन् ।” तरुण दल रोल्पाका सभापति र बालिका निर्मला पन्तका हत्यारालाई संरक्षण गरेर सरकार नै मानवअधिकारको भक्षक भएको भन्दै तरुण दल अमेरिकाले प्रदर्शन गर्न लागेको हो ।
वासिङ्टन डिसी स्थित नेपाली राजदूतवासले प्रधानमन्त्री के पी शर्मा ओलीको भ्रमण अवधिमा नेपाली समुदायबाट सार्वजनिक विरोधको कार्यक्रम नवनोस भन्न विभिन्न संघ संस्थासँग शनिवार अन्तरक्रिया गरेको थियो । राजदूत अर्जुन कार्की, नेपाल मिसन प्रमुख निर्मल राज काफ्ले सहभागी रहेको नेपाली समुदायसँगको छलफलबाट प्रधानमन्त्री ओली र एनआरएनए अमेरिकाका अध्यक्ष डाक्टर केशव पौडेललाई विशेष समय दिने र अरू संघ संस्थाका प्रतिनिधिलाई दुई मिनेटको समय दिने सहमति भएको थियो । प्रधानमन्त्रीसँगको अन्तरक्रिया पछि तरुण दल अमेरिकाले ज्ञापन पत्र बुझाउने कार्यक्रम तय भएको थियो । प्रधानमन्त्री ओली अमेरिका आएपछि आइतबार दिउसो भने अघिल्लो दिन भएको सहमति भन्दा बाहिर गएर कार्यक्रमको खाका बनाइएको सिटौलाले बताए । ज्ञापन पत्र बुझाउने कार्यक्रम राजदूतावासले हटाएपछि तरुण दल अमेरिकाले संयुक्त राष्ट्रसंघ अगाडि सार्वजनिक विरोध प्रदर्शनको तयारी गरेको हो ।

बालिका निर्मलाको हत्यारालाई कारबाहीको दायरामा ल्याउन माग गर्दै अमेरिकामा थुप्रै नेपालीहरूले प्रधानमन्त्री ओली विरुद्ध सामाजिक सन्जाल रंग्याएका छन् ।

तस्बिर: सामाजिकसन्जालबाट


८ आश्विन २०७५, सोमबार ०४:४३ मा प्रकाशित