वित्तीय पहुँचमा ६० प्रतिशत नागरिक

दूरबिन नेपाल     ९ मंसिर २०७५, आईतवार १४:१२    

काठमाडौँ, ९ मङ्सिर / मुलुकका ६० प्रतिशत नागरिकले वित्तीय सुविधा प्राप्त गरेका छन् ।

वाणिज्य बैंक, विकास बैंक, लघुवित्त संस्था तथा तिनका देशभरका चार हजार ३२२ शाखाबाट वित्तीय सुविधा जनतालाई उपलब्ध गराइएको हो ।

नेपाल वित्तीय संस्था कर्मचारी सङ्घले आज यहाँ आयोजना गरेको वित्तीय क्षेत्रको अववस्था’ विषयक अन्तक्र्रियामा नेपाल राष्ट्र बैंकका गभर्नर डा चिरञ्जीवी नेपालले आधुनिक समाजमा वित्तीय क्षेत्रको महत्व बढ्दै गएको बताउनुभयो । आगामी दिनमा बाँकी रहेका ४० प्रतिशत नागरिकलाई पनि वित्तीय सञ्जालमा जोड्नुपर्ने उहाँले बताउनुभयो । नेपाल बैङ्कर्स सङ्घका अध्यक्ष ज्ञानेन्द्र ढुङ्गानाले परिवर्तित संरचनाअनुसार ७५३ स्थानीय तहमा सरकारले वितरण गर्ने रकम अझै बैंकमा प्राप्त हुन नसकेका कारण प्रथम चौमासिकमा करीब रु ९० अर्बको निक्षेप कमी भएको बताउनुभयो ।

राष्ट्र बैंकका कार्यकारी निर्देशक नरबहादुर थापाले अहिले देशमा लगानीका लागि कर्जाको माग बढ्दै गएको भए पनि आन्तरिक स्रोतले त्यसको व्यवस्थापन गर्न कठिन रहेको बताउनुभयो । सङ्घका अध्यक्ष पदमराज रेग्मीले मुलुकमा वित्तीय क्षेत्रलाई बलियो बनाउन निक्षेप सङ्कलन र ऋण प्रवाहमा कायम गरिने व्याजदर सन्तुलित हुनुपर्नेमा जोड दिनुभयो । रासस


९ मंसिर २०७५, आईतवार १४:१२ मा प्रकाशित