डिपिएल : घरेलु टिम धनगढीको तेस्रो हार, प्ले अफ सम्भावना कमजोर

दूरबिन नेपाल     १ फाल्गुन २०७५, बुधबार १४:२१    

धनगढी । धनगढी स्टार्सले रुस्लान धनगढी प्रिमियर लिग (डीपीएल) क्रिकेटमा लगातार तेस्रो हार व्यहोरेको छ । बुधबार भएको खेलमा घरेलु टिम विराटनगर किंग्ससंग पनि २१ रनले पराजित भयो ।  यो हारपछि धनगढीको प्लेअफ पुग्ने सम्भावना कमजोर भएको छ । अहिलेसम्म धनगढी अंक विहीन छ । अव धनगढी स्टार्सले दुई खेल खेल्न बाँकी छ ।

 

फाप्ला क्रिकेट मैदानमा करण केसीको कप्तानीमा रहेको विराटनगरले टस जितेर पहिले ब्याटिङ गर्दै पुरै २० ओभरमा ९ विकेट गुमाएर एक सय तीन रन बनायो । विराटनगरका अभिनास यादवले सर्वाधिक २७ रन जोड्दा कप्तान करण केसीले २१ रन बनाए । यस्तै आसिफ शेखले १२ र संसद शेख ११ रन जोडे ।  धनगढीका लागि कप्तान सोमपाल कामी र विपिन कार्कीले ३÷३ विकेट लिए । सोमपालले ३ ओभरमा ८ रन खर्चिए भने विपिनले ४ ओभर बलिङ गर्दै १९ रन खर्चिए । रोवीन क्षेत्रीले २ विकेट लिए ।

जवाफमा एक सय चार रनको लक्ष्य सहित जवाफी ब्याटिङ गरेको सोमपाल कामीको धनगढी १९ ओभरमा अलआउट हुँदै ८२ रनमा समेटियो । धनगढीका लागि सन्दीप रजालीले सर्वाधिक ३४ तथा राजु रिजालले १५ रन जोडे । अन्य ८ ब्याट्सम्यानले दोहोरो अंक जोड्न सकेनन् । धनगढीलाई सस्तैमा समेट्न विराटनगरका अभिनास यादवले ४ ओभर बलिङ गर्दै १० रन खर्चिएर ४ विकेट लिए । यस्तै कप्तान करण केसीले ४ ओभरमा २४ रन खर्चेर ४ विकेट नै लिए । सुसन भारीको नाममा २ विकेट रह्यो ।

 

यस्तै ज्ञानेन्द्र मल्लको कप्तानीमा रहेको काठमाडौं गोल्डेन्सले महेन्द्रनगर युनाइटेडलाई सात रनले हरायो । काठमाडौंको यो दोस्रो जित हो । टस हारेर पहिले ब्याटिङ गरेको काठमाडौंले २० ओभर पुरै खेल्दै ५ विकेट क्षतीमा एक सय ३४ रन बनायो । काठमाडौंका पारीमा अंकित दबासले अविजित ६५ रन पारी खेले । दबासले ५५ बलमा ५ चौका र ३ छक्का प्रहार गरे ।

यस्तै योगेन्द्र सिंह कार्की २२ रनमा अविजित रहे । काठमाडौंका कप्तान ज्ञानेन्द्र मल्ल १४ रनमा आउट हुँदा महेबुब आलमले १३ रन जोडे । सोनु तामाङ र गौरव तमोर १ – १ रनमा पेभेलियन फर्कदा अनिल कुमार साहले ६ रन बनाए । महेन्द्रनगरका अमर सिंह रौटेलाले २ विकेट लिए । मोहमद नाभिद, सागर ढकाल र अविनाश बोहराले समान १ – १ विकेट लिए ।

एक सय ३५ रनको लक्ष्य सहित जवाफी ब्याटिङ उत्रिएको शरद भेषावकरको महेन्द्रनगरले २० ओभरमा ८ विकेट गुमाएर एक सय २७ रनमा समेटियो । महेन्द्रनगरका लागि अमर सिंह रौटेलाले अविजित २८ रन जोडे । यस्तै कप्तान शरद भेषवाकरले २३ रन जोड्दा आरिफ शेखले १८ रन बनाए । आनन्द सुब्रमन्यु १५ र रोहित कुमार पौडेलले १० रन बनाएर आउट भए । काठमाडौंका राशिद खानले ३ तथा अंकित दवासले २ विकेट लिए ।

 

जितसंगै काठमाडौंले २ खेलबाट ४ अंक जोडेको छ । र, काठमाडौं लिगको दोस्रो स्थानमा उक्लिएको छ । काठमाडौंले पहिलो खेलमा धनगढीलाई ४ विकेटले हराएको थियो । महेन्द्रनगरको भने यो लगातार दोस्रो हार हो । महेन्द्रनगर पहिलो खेलमा रुपन्देही च्यालेन्जर्ससंग २ रनले पराजित भएको थियो । लगातार दुई हार व्यहोरेपछि महेन्द्रनगरलाई प्ले अफमा पुग्न बाँकी खेल जित्नै पर्ने दबाब बढेको छ । अंक विहीन महेन्द्रनगर पाँचौ स्थानमा छ ।

तस्वीर : आयाेजक 


१ फाल्गुन २०७५, बुधबार १४:२१ मा प्रकाशित