पत्रको जवाफ आएपछि निर्णय गर्छु: सूर्य लम्साल

दूरबिन नेपाल     २९ चैत्र २०७५, शुक्रबार ०६:१०    

अमेरिका ।

तिन वुदे माग पत्रको जवाफ आएपछि कसरी अगाडि बढ्ने भन्ने विषयमा निर्णय गर्ने एनआरएनए अमेरिका अध्यक्ष पदका उम्मेदवार सूर्य लम्सालले बताएका छन् । अध्यक्ष डाक्टर केशव पौडेललाई सम्बोधन गर्दै लम्सालले लेखेको पत्रमा निर्वाचन समिति निष्पक्ष नभएको, सदस्यताको अन्तिम समयमा सरभर सुस्त र नचल्ने बनाइएको सम्बन्धमा छानबिन र सदस्यता भेरिफिकेशन पछिको समयमा सदस्यहरूको विवरणलाई कसले कसरी निगरानी गर्‍यो लगायतका विषयमा २४ घण्टा भित्र जानकारी उपलब्ध गराउन भनिएको छ ।

यसै विषयमा दूरबिन नेपालमा समाचार प्रकाशित भएपछि प्रतिक्रिया दिँदै लम्सालले भने “मैले बिहीबार दिउसो पत्र पठाएको हो । मुद्धाका लागि गरिएको हैन । २४ घण्टा पछि म पब्लिकमा जान्छु भनेको छु ।”

लम्सालले पत्रको जवाफ आएपछि सहयोगी, अरू उम्मेदवार र आम मानिसको भावना अनुसार कसरी अगाडि बढ्ने भनेर निर्णय लिने बताए । पहिला पनि समय थियो अन्तिम समयमा पत्र पठाउनु र माग गर्नुको अर्थ के हो ? भनी दूरबिन नेपालले गरेको प्रश्नमा लम्सालले भने “मैले औपचारिक हिसाबले उम्मेदवारी घोषणा गरेपछि मात्र सबै विषयमा थप प्रस्ट हुन र अरूलाई पनि बुझाउनु पर्ने भयो त्यसैले पत्र लेखेको हुँ ।”

निर्वाचन रोक्ने मनसायले तपाइले यो काम गर्नु भएको हो भन्ने धेरैको बुझाइ रहेको छ नि भनी गरिएको अर्को प्रश्नको जवाफ लम्सालले समयमा चित्तबुझ्दो जवाफ आएमा निर्वाचन प्रक्रियामा बाधा नपुग्ने बताए ।

चित्त बुझ्दो जवाफ आएन भने उम्मेदवारी दाखिला गर्नु हुन्छ की हुन्न भन्ने प्रश्नमा लम्सालले भने “यसको जवाफ अहिले नै दिनु धेरै हतार हुनेछ ।”

जवाफ चित्त नबुझे तपाईँ अदालत जानुहुन्छ ? भनी गरिएको प्रश्नमा लम्सालले भने “अरू उम्मेदवार र आम समुदायको सल्लाह र भावना अनुसार निर्णय गर्छु । यस बारेमा मेरो थप भनाई अहिलेलाई केही छैन ।”


२९ चैत्र २०७५, शुक्रबार ०६:१० मा प्रकाशित