बढ्यो डलरको भाउ

दूरबिन नेपाल     १९ भाद्र २०७६, बिहीबार ०५:१५    

 दूरबिन नेपाल

भारतीय अर्थतन्त्रमा मन्दी छाउँदै गएपछि अमेरिकी डलर बलियो भएको छ । नेपाल राष्ट्र बैङ्कले बुधवार मङ्गलवार एक डलरको खरिददर ११६ रुपैयाँ १५ पैसा र बिक्रीदर ११५ रुपैयाँ ५५ पैसा तोकेको छ।

कमजोर अर्थतन्त्रको कारण भारतीय रुपैयाँमा गिरावट आएपछि भारतीयसँगै नेपाली रुपैयाँ पनि ओरालो लागेको छ ।

नेपाली र भारतीय रुपैयाँबिच स्थिर विनिमय दर भएका कारण भारु कमजोर हुनासाथ नेपाली रुपैयाँ पनि कमजोर र बलियो हुँदा बलियो हुने गरेको छ। डलरको भाउ एक महिनाको अवधिमा नै करिब ५ रुपैयाँले बढेको छ। राष्ट्र बैङ्कले साउन २० गते अमेरिकी डलर एकको खरिददर १११ रुपैयाँ ०४ पैसा तोकेको थियो।

नेपाली रुपैयाँ कमजोर र अमेरिकी डलर बलियो बन्न पुग्दा विदेशबाट आयात हुने सामान महँगो हुँदै गएको छ। डलर बलियो भएका कारण उपभोक्ताले विदेशी सामान किन्दा बढी मूल्य तिर्नुपर्ने अवस्था आएको छ।

भारतीय मुद्रा कमजोर हुनुलाई भारतको अर्थतन्त्र कमजोर हुँदै गएको सङ्केतका रूपमा लिन सकिने पनि विज्ञको भनाइ छ। २०७५ साल असोज २६ गते डलर मजबुत हुँदै गएर एक डलर किन्न एक सय १९ रुपैयाँसम्म तिर्नुपरेको थियो। त्यसपछि डलर निरन्तर कमजोर हुँदै गएको थियो। अहिले पुन डलर बलियो हुँदै गएको छ।

डलर बलियो हुँदा पर्यटन क्षेत्र, निकासीकर्ता र रेमिटेन्स पाउनेलाई मात्र फाइदा भए पनि राज्यले अन्तराष्ट्रियरुपमा भुक्तानी गनुपर्ने ऋणको भार भने बढ्ने गर्दछ । यद्यपि चाडबाडको मौसममा अमेरिका लगायतका देशबाट रेमिटेन्स पठाउँदा नेपालमा हुने आफन्तले बढी रकम प्राप्त गर्दछन् ।


१९ भाद्र २०७६, बिहीबार ०५:१५ मा प्रकाशित