अमेरिकाको न्युयोर्ककमा बढ्यो असुरक्षाः एकै दिनमा दुई प्रहरी अधिकारीको हत्या प्रयास

दूरबिन नेपाल     २९ माघ २०७६, बुधबार ०२:३२    

दूरबिन नेपाल, न्युयोर्क
न्युयोर्कमा २४ घण्टामा दुई प्रहरी अधिकारीमाथी गोली प्रहार गरिएको छ । गोली प्रहारबाट भाग्यबस दुवै प्रहरी अधिकारी बाँचेका छन । घटना बेग्ला बेग्लै स्थानमा र भिन्न समयमा भएको थियो । गोली प्रहार गर्ने व्यक्तिको पहिचान अझै हुन सकेको छैन तर एकजना संदिग्ध व्यक्तिलाई प्रहरीले नियन्त्रणमा लिएको जनाएपनि उसको परिचय भने खुलाएको छैन । पहिलो घटना शनिवार राती भएको थियो । न्युयोर्कको ब्रङ्रसमा भएको शनिवारको सो घटनामा एकजना प्रहरी घाइते भएका छन । दुईजना प्रहरी अधिकारी भ्यानमा बसीरहेका बेला कालो ज्याकेट लगाएका एक व्यक्तिले बाटो सोध्यो अनि गोली चलाउन शुरु गरेको प्रहरीले जनाएको छ । गोली प्रहारबाट एक प्रहरी घाइते बने भने अर्का प्रहरीलाई गोली लाग्न पाएन । घाइते प्रहरीको उपचार भइरहेको छ । त्यसको केही घण्टापछि अर्थात आइतबार विहान आठ बजेतीर ब्रङ्सको ४१ स्ट्रीट पिसिङ्टमा हिंडिरहेका एक व्यक्तिले प्रहरीमाथी गोली चलाए । गोली प्रहारबाट घाइते भएका अर्का प्रहरीको उपचार भइरहेको छ । गोली प्रहार गर्ने शंकास्पद व्यक्तिलाई प्रहरीले समातेको छ । तर दुवै घटनामा एकै व्यक्तिको संलग्नता छ वा छैन भन्नेबारे अनुसन्धान भइरहेको प्रहरीले जनाएको छ ।

घटनाबारे दुख व्यक्त गर्दै न्युयोर्कका मेयर बिल डे ब्लाजियोले सो घटनालाई २४ घण्टामा क्रुर हत्याको प्रयास भएको र प्रहरीमाथीको आक्रमण न्युयोर्कवासीमाथीको आक्रमण भन्दै ट्वीट गरेका छन । ब्लाजियोले घटनालाई घृणित कार्य र न्युयोर्कवासीहरुलाई विभाजन गरी सुरक्षालाई कमजोर पार्न खोजिएको असफल प्रयास भन्दै ट्वीट थपेका छन तुलनात्मकरुपमा सुरक्षित मानिएको न्युयोर्कमा पछिल्लो समय असुरक्षा बढ्दै गएको छ । पछिल्ला तथ्यांकहरुले न्युयोर्कमा असुरक्षा बढ्दै गएको देखिएको छ ।


२९ माघ २०७६, बुधबार ०२:३२ मा प्रकाशित